• Text zum Mitsingen

 Mi Dorf...

Mi Dorf, das lit am Blaue,
s chönnt gar nit schöner si
igraamt vo Wald und Aue
au Räbe hets derbi – au Räbe hets derbi

Refrain: Guggug hesch ghert? Loos do – loos dert!

Die Leimetaler Ärde
schänkt eus gar schöni Frucht,
und ooni zvil Beschwärde
het jede, was er brucht – het jede, was er brucht

Refrain: Guggug hesch ghert? Loos do – loos dert!

Wird s Früelig, wird s au Maie
das bringt eim neue Muet
Me dänkt an d’Chirsiwaie
und schwingt dr Sommerhuet – und schwingt dr Sommerhuet

Refrain: Guggug hesch ghert? Loos do – loos dert!

Drum isch das Völkli immer
gärn froh und luschtig gsi,
und wärde d Zite schlimmer
seit jede: s got verbi – seit jede: s got verbi

Refrain: Guggug hesch ghert? Loos do – loos dert!

So schaffe mir und ringe
eus dure, Joor für Joor
Mir weis zue öppis bringe
im silbergraue Hoor – im silbergraue Hoor

Refrain:     Guggug hesch ghert? Loos do – loos dert!

Mir luege voll Vertraue
Wenns wätteret und blitzt,
zum Vater, wo dr Blaue
und s Dorf und d Gugger schützt – und s Dorf und d Gugger schützt

Refrain: Guggug hesch ghert? Loos do – loos dert!